اعمل ايه بس؟؟؟؟؟؟؟؟؟

انا بجد مش عارفه اعمل ايه؟

انا راجعه النهارده البيت بجد حاسه انى مخنوقه وحالتى زى الزفت والله كنت بكلم نفسى فى الشارع

وبالظبط كنت بقول انا استاهل اللى انا فيه ده

استاهل احتار واشيل الهم استاهل انى ابقى عايشه فى نار مش ليها اخر ولا حل

بس والله السبب مش فيا انا

انا كنت عاديه جدا عايشه يومى ومش بفكر ولا بتعب قلبى فى التفكير بحد

كان قلبى ده لا بيفكر فى حد ولا بشيل هم حد ولا بيزعل انه حد مش بيفكر فيه

ولا بكى ليالى طويله لانه مش على بال الى شغاله ليل ونهار

كنت عاديه جدا...صحيح كتير كنت بتمنى كتير انى احب واتحب زى بنات كتير

لكن كنت برجع على طلو تانى واقول لا ابعد عن الحب وغنيله

يعنى انا لو حبيت مش هقدر اعيش قصه الحب دى زى ما البنات بتعمل

لان اخلاقى ومبدأى ماتسمحليش انى اعمل حاجه غلط او تغضب ربنا

كنت برجع واقول اخلى الحب فى قلبى لحد ما يجى صاحب النصيب...واللى يوم ما هاقولها ليه هتبقى دى اول مره لسانى ينطقها

لكن مش عارفه ايه اللى حصلى معرفش مش قادره اوصل لتفسير

دلوقتى مش مجرد انى قلبى اتعلق بيك وخلاص ...لا ده انا بقى نفسى اتكلم معاك على طول اعرف اخبارك دايما

بتمنى انك تكون بتفكر فيا ربع ما بفكر فيك

اتمنى اعرف انا ايه بالنسبه ليك؟؟؟؟؟

ده اللى هيخلى عقلى يتجنن دقيقه احس انى بالنسبه ليك حد فعلا مهم وانى وانى ...

ودقيقه العكس تماما

انت متعرفش اد ايه انا بحس بالحزن واالحباط فى الدقيقه دى بحس انى بتهد من جوايا

بحس انى بنتهى ومش يبقى ليا اى وجود

بجد بجد

نفسى ارتاح وارجع تانى زى زمان

ارجه تانى زى ماصحابى اتعودا عليا

زى ما اهلى عرفونى من 22 سنه

نفسى ارجع بقلبى فاضى زى الاول

ياااارب... يارب مش هقدر اقول غير كده

هو قادر يهدينى للطريق الصح ويثبتنى عليه

كان يوم جميل وضحكت كتير مع اصحابى وهزرنا كتير لدرجه انى بقيت اقول ربنا يستر
وعلى اخر الليل بتفرج على التلفزيون شوفت البرناج ده....وكالعاده. نمت وانا فى قمه الحزن

اتفرجت على برنامج الحقيقه على دريم تو ..وكان موضوع الحلقه عن ضحايا احداث المحله
هم اتنين شاب فى الخامسه عشر من عمره يعنى فى تالته اعدادى وده كان واقف بيتفرج على اللى بيحصل فى الشارع من البلكونه
والثانى شاب فى الرابعه والعشرين من عمره وده كان موجود فى الاشتباكات فى الشارع من باقى الناس
المهم بقى واللى اثر فيا جدا واللى فضل شاغل تفكيرى لبعدها ان اعداد البرنامج اتصل بسياده اللوا مش عارفه مين واللى مسئول عن مش عارفه فى مجلس البتاع ده
وسياده اللوا قال رايه بمنتهى الصراحه ....قال ان عساكر امن الدوله من حقها تضرب الرصاص الحى بطريقه عشوائيه فى كل مكان وفى اى وقت
ده امن مصر ياناس...وكل اشتبااكات يبقى لازم ليها ضحايا فيها ايه لما شويه ناس تموت فى سبيل حفظ امن مصر
يعنى الشاب اللى عمره 24سنه ده وماله لما يموت فى ايه لما اسره بحالها تتشرد واب عجوز مريض مش يلاقى اللى يجيب له علاجه واكله
فيها ايه لما حياتهم كلاه تبوظ وتنتهى عشان خاطر عسكرى ضرب عليه النار من مسافه قريبه جدا وبالظبط نشن على دماغه
لدرجه انه مخ الشاب ده اتبعثر على الارض جنب جثته
واستمرارا لمسلسل الاستنزاف والاستغلال البشع اللى بيحصل للمصرين -الغلابا بس - حتى بعد الوفاه خدوا الجثه عل المستشفى وهو كان خلاص مات وطلبوا دم من اهله عشان هو محتاج دم ...اخوه بيقول15 واحد اتبرعوا بالدم وفى الاخر عرفوا انه كان متوفى اصلا
رأى سياده للوا انه ده يستاهل اللى حصله ..حد قاله يمشى معاهم ولا يروح يحضر مظاهره
فيها ايه لما مش يلاقى رغيف العيش فيها ايه لما هو لحد دلوقتى مش عارف يتجوز ولا يكون اسره فيها ايه انه اصلا مش عارف ولا قادر يحقق اى حلم حلم فى يوم بيه

اما بقى بالنسبه للشاب التانى اللى اصلا كان واقف فى البلكونه واللى رصاصه عسكرى امن الدوله اصابته هو كمان فى راسه
فهو برده يستاهل اللى يحصله لانه مش عارف يقف فين وامتى ...ايه اللى يوقفه فى بلكونه بيتهم فى الوقت ده
هو اللى غلطان ويستاهل اكتر من كده
يعنى هو لو مكنش توفى دلوقتى مش بعيد سيداه اللوا كان طالب باعدامه فى ميدان عام حتى يكون عبره لمن لا يعتبر
ولما استاذ وائل بيقوله حضرتك بتتكلم عن ولد عمره 15 سنه وبتقوله يقف امتى وفين وبتحمله المسؤليه كمان
قاله ابوه وامه كانوا فين ...
رد ابوه وقاله كان واقف فى البلكونه فى بيتنا يعنى منزلتوش الشارع ...وانتو محدش قال انه فى ضرب نار
محدش قال انه فى ضرب نار
وتانى حضره اللوا يقول وفيها ايه لما دول يموتوا احنا كنا فى حاله اضراب وشغب عام وهتعمل اتقلاب فى نظام الحكم
ساله تانى وائل التقراشى يعنى حضرتك لو ابنك هو اللى كان فى البلكونه وحصله كده هتقول وايه يعنى
رد وقاله فى ستين داهيه ...ادام هو مش عارف يقف فين وامتى يبقى فى ستين داهيه...
المهم موقف كمان ظهر من كلام حضرته لما اهل المتوفى بيقولوا شهيد
قام طالع فيهم وقالهم شهيد ايه على اعتبار انهم مش يستاهلوا اللقلب ده.دول مخربين وشويه بلطجيه
وانهم مش يستاهلوا تعويض من الحكومه....وكمان رئيس الوزرا غلط جدا انه نزل المحله وادى اللعمال فى المصانع هناك مكافاه
هو مش عارف المكافاه دى ليه والتعويض ده ليه.....احنا كده بنشجعهم على الفساد

افتكرت اثناء حديثه احمد زكى فى فيلم زوجه رجل مهم
وفضلت اقول منك لله وحسبى الله ونعم الوكيل فيك ..واكيد ربنا هيوريك يوم شكل ده عشان ربنا مابينساش حد ويجيب دعوه المظلوم
وان الله يمهل ولا يهمل

بسم الله نبدأ

الحمد لله كما ينبغى لجلال وجهك وعظيم سلطانك

بدايه وبكل صراحه انا مش عارفه ليه عملت المدونه دى

يمكن لانى كتير بحب اتكلم مع حد مش يعرفنى شخصيا او بطريقه مباشره

لانى من نوع البشر اللى بيرتاح لما يطلع اللى جواه بالكتابه

ولانى اكيد اكيد هستفاد من موضوع التدوين ان شاء الله

رجائى من ربى ان يوفقنى فى حياتى ونعرف نوصل سوا لمواضيع مفيده لينا

المهم الاستمراريه فى الموضوع واهى تبقى محاوله مثل باقى حياتنا واللى عباره عن مجموعه من المحاولات والتجارب....نسأل الله التوفيق والثبات

دمتم بخير.....